Plantun de Prouvènço

Pèr coumpara dos planto d'encò nostre

Carex pseudocyperus & Picea abies

Queirello(-faus-triangle)

Carex pseudocyperus

Cyperaceae

Àutri noum : Moutouso, Sagneto.

Nom en français : Laiche faux souchet.

Descripcioun :
Aquesto grando queirello trachis en mato de la grosso, en ribo d'estang o de ribiero, prado à rousèu e palunaio. Fai uno espigo masclo e de 3 à 5 espigo femello, pourtado pèr un pecou e que penjon. Se recounèis à sis escaume d'utriculo barbudo e subretout i bè d'aquésti d'aqui long e bifido (fotò). S'arrapon i vèsti un cop maduro. Se recounèis peréu à si lòngui fueio (6 à 12 mm de larjo) qu'an coume un rego au mitan.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Grando erbo
Taio : 30 à 100 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Carex
Famiho : Cyperaceae

Ordre : Poales

Coulour de la flour : Brunello
Petalo : ges
Ø (o loungour) enflourejado : 5 à 8 cm
Flourido : Printèms - Estiéu

Sòu : Ca
Autour basso e auto : 0 à 700 m
Aparado : Noun
Mai à juliet

Liò : Ribiero - Prado à rousèu - Estang - Palun
Estànci : Mesoumediterran à Mountagnard
Couroulougi : Subrecousmoupoulito
Ref. sc. : Carex pseudocyperus L., 1753

Serento

Picea abies

Pinaceae

Àutri noum : Serénta, Sarento, Sourento, Serinte, Sùfi.

Noms en français : Epicéa, Épicéa commun.

Descripcioun :
Pèr pas s'engana emé lou sapin fau regarda coume soun lis aguio o peréu li pigno (o vacheto). Li fueio de la serento soun estacado tout à l'entour de la ramo coume uno brosso, au contro de li dóu sap que soun tóuti dins lou meme plan coume un penche. De nouta pamens qu'acò marcho pas pèr d'ùni sap fourestié (coume Abies pinsapo). Li pigno pendoulon, alor qu'encò dóu sap, quouro li poudès vèire, se tènon bèn drecho.

Usanço :
I'a touto meno d'utilisacioun dóu bos segound sa qualita. La pegoulo (resino) èi di proun vulneràri. Foundudo, servié, à passa tèms, pèr sougna li tigno (J.-R. Fortoul). Li jóuini fueio soun manjadisso (ensalado, pèis), an lou goust de citroun.